Women empowerment – Deepika Padukone – “My Choice” reply – महिला सशक्तिकरण


Ye sach hai ki aaj ke samaj me apradh bad gaye hai khashkar mahilaon ke prati. Isliye women empowerment ki jaroorat to hai lekin kya Deepika padukone ki my choice women empowerment ke liye sahi tarika hai ? Kya wakai me is video me mahilaon ke prati ho rahe apradh ka hal bataya gaya hai taki hum ise women empowerment ke liye uthaya gaya achha kadam hai keh keh ke iski sarahana kar sake. Mera manna hai ki bilkul nahi. haa freedom sabke liye honi chahiye lekin my choce is not a right option.

Agar mahilao ko apni choice se jindagi jeene se women empowerment mil jati hai to why not men should have their own choce ? unke paas to jyada choice hoti hai. My choice bilkul honi chahiye sirf women hi nahi sabke liye lekin uski bhi ek limit honi chahiye. Limit isliye honi chahiye kyuki agar har koi without limitation sirf my choce ko follow kar karke apni marzi karne lage to ye samaj ka astitwa hi khatam ho jayega. Sab kuch bikhar jayega. Fir insan aur janwaro me koi fark nahi reh jayega.
Mahilaon ki bhawnao ko mai samaj raha hu. Wo bhi purusho ki tarah khulke jeena chahti hai, aazadi chahti hai. Agar gour se dekha jaye to my choce film banake ke peeche maksad to achha nazar aata hai lekin uska tarika sahi nahi hai. Women empowerment ka matlab sirf sexual aur fashion ki aazadi nahi hai jaisa ki film me dikhaya gaya hai.

Women empowerment
ka maksad asal me tab pura hoga jab sex rasio me badlaw aayega. Jab hamara samaj me mahilao ko har kshetra me purusho ki tarah hi saman adhikar milne lagega. Mahilao ki jansankhya itni ho jaye ki purush dekhte dekhte thak jaye. Mahilaye har field me itni takatwar ho ki purush ko usse competition karna pade. Mahilayen apne aapko itna kabil bana le ki purush khud dahej lene ki wajai dahej dene ke liye taiyaar ho.

Mera manna hai ki agar hum wakai me women empowerment chahte hai to sabse pehle hume mahilao ko kamjor darsane wale kuch dialogue par bann lagana padega. Jaise ki aksar hum kisiko kamjor darsane ke liye is dialogue ka proyog karte hai “Agar tumse ye kaam nahi hota to jao jake chudiyan pehankar ghar me baith jao”. is wakya se spast pata chalta hai ki hum mahilaon ko kitna kamjor samajhte hai. Ye bhale hi kisi film ka dialogue ho sakta hai lekin asal me ye humare samaj ki sankirn mansikta ka sawal hai.

Ek aur baat jo bhale hi aap mujhse sehmat nahi honge lekin mere hisab se ye nahi honi chahiye. Aur wo hai “Mahilaon ke liye alag se reservation”

Bhale reservation mahilaon ke fayde ke liye hi hota hai lekin agar dhyan se dekha jaye to aisa karke kahin na kahin hum unhe kamjor sabit kar rahe hai. ki aapko reservation ki jaroorat isliye hai kyuki aap kamjor ho. Aap me kabiliyat ki kami hai. Dekhiye sarkar ko bhi lagta hai ki aap apni mehnat se kuch hasil nahi kar sakti isliye aapko reservation ki jaroorat hai.

Tisri baat why ladies first ? Ye meharbaani kyu ? Kyuki ladies kamjor hai. Kya darsana chahte hai ? Ladies and gents ek saath nahi chal sakte hai kya ?

Mujhe malum hai ki iske dusre pehlu bhi hai. Ladies first se matlab mahilaon ko samman dena bhi hota hai. Lekin har chij ke dusre pehlu bhi hote hai jise nazarandaaz nahi kiya jana chahiye.

Hume ye maanna padega ki Humare samaj fitrat me kuch aisi baate hai jo ki mahilao ko kamjor sabit karti hai. Jisko badle bina women empowerment ki baat karna baimani lagti hai.

Aaj sabhi women empowerment ki baat karta hai lekin mai kehta hu ki is sabd ki hume jaroorat ki kyu padi hum “man empowerment” ki baat to nahi karte. Kisne diya ye sabd ?

Jawab bahot kadwa hai lekin sach hai. Humara samaj ne hi is sabd ko janm diya aur ab wahi ise khatam karne ki baat karta hai. Isme humara samaj ka doglapan nazar aata hai.

Ek taraf humara samaj hi ladki paida hote hi use kamjor saabit karne ke liye lag jata hai, har chij me ladka ladki me bhedbhaw. Tu ladki hai isliye ye nahi kar sakti wo nahi kar sakti bla bla bla. Aur dusri taraf women empowerment ki baat karke mahilaon se sahanubhuti lena chahte hai. Aisa band hona chahiye.

Samaj ka ye dohra charitra se women empowerment sambhav hi nahi hai. Agar sach me women empowerment chahte hai to sabse pehle har us chij par bann lagani padegi jo mahilao ko kamjor darsane ki koshish karta hai. Chahe wo kisi film ka dialogue ho ya fir ladies first ka nara.

Agar women empowerment chahiye to reservation ki jagah protsahan de taki mahilaye bhi purusho ke saath kadam se kadam milakar chal sake. Ladies first ki jagah saath saath chalne ke liye prerit kare. Is ghatiya soch ko nikal de ki chudiya pehne ka matlab kamjor hona hota hai. Mahilaon ki chudiyan sirf unka sringar hi nahi hota balki unka purusho ke prati unke samman ki bhaw ko bhi darsata hai.


Advertisements

Corruption reasons & solutions – भ्रष्टाचार के कारण और निवारण


Chaliye 1031 (Anti corruption helpline number Delhi) start ho gaya. Achhi pehal hai Delhi sarkar dwara dekhte hai kaha tak corruption kum hota hai. Lekin kya wakai me corruption rokna itna aasaan kaam hai kya ? Kya shikayat karta khud ye dawa kar sakta hai ki usne khud kabhi bhrashtachar nahi kiya ya fir aage nahi karega. Bahot mushkil sawal hai ki iska jaanch kaise hoga ? Bahot hi khatarnaak virus hai ye bhai isne abtak 99 % logo ko apne kabje me le rakha hai. Are yaad aaya ye to ek film ka dialouge bhi hai mera bharat mahan so me se 99 baimaan. Par isme galat bhi kya hai sach hai to hai ki 1% ko chhor ke har vyakti kisi na kisi roop me corruption me lipt hai. Koi janbujhkar karta hai to koi majboori me.

Corruption koi abhi ka mudda nahi hai. ye to warso se chala aa raha hai. raja maharaja ke jamane me bhi hota tha. Corruption ek bahot badi samajik samashya hai ye alag baat hai ki aajkal iska rajnitikaran ho gaya hai.

Corruption ek aisi samashya hai jiska permanent soulution nikalna bahot mushkil hai kyuki ye sidha insan ke dimag se juda hua mamla hai. Aur kisi ke dimag pe control karna to aashaan kaam nahi lagta. Hum sabko pata hai ki corruption ka bas ek hi karan hai aur wo hai “lalach”

Lekin mere hisab se corruption ko do bhago me rakhkar dekha jana chahiye. Ek “Aam aadmi ka corruption” aur dusra “Khas aadmi ka corruption”
Kyuki vyakti corruption sirf iskiye nahi karta kyuki wo lalchi hai uski majburi bhi to ho sakti hai. Udaharan ke tour par kisi sarkari daftar par kuch kaam karwane ke liye kisi ki sifarish ki jaroorat hoti hai ya fir ghus ki…ye to aam baat hai. Ab ye to majboori hi hui na…agar bina sifarish ke uska kaam ban jata to wo ghus dene wali kaam karta hi kyu. To aise case me hum us vyakti ko corrupt nahi keh sakte kyuki ye uski majburi thi. Ye kisi vyakti vishesh ka falt nahi kaha ja sakta hai kyuki ye humara system ka falt hai. Har koi kisi bhi kaam ke liye aashan rasta chahta hai ye insan ka fitrat hota hai. Fir aise me wo kyu aisa rasta chunega jisme uska kaam latka rahe aur jaan ka bhi khatra ho. Kyu wo imandar bankar corruption ke khilap aawaj uthaye. Kya aisa karna kisi vyakti vishesh ki jimmedari hai. Bikul nahi har vyakti ki jimmedari ye hoti hai ki wo apna aur apne parivar ka khyal rakhe aur khush rakhe. Na ki logo ko sudharne ke chakkar me khud ki aur apne pariwar ki jaan jokhim me daal de.

Burai ke khilap aawaj uthana jaroori to hai lekin usse bhi jyada jaroori ye hai ki hum burai ko panapne hi na de taki aisi noubat hi na aaye ki hume usse ladna pade.

Maine corruption ko do bhago me isliye baata hai kyuki “Khas aadmi ka corruption” to samajh me aata hai ki unme lalach ka matra jaroorat se jyada hota hai isliye isme koi sak nahi ki ye galat hai aur use rokna bahot hi aawashyak hai. Lekin aam aadmi ke bhrastachar ko thoda alag paimane me maapne ki jaroorat hai. Kyuki ek aam aadmi ka lalach jyadatar simit matra me hota hai. Wo tabtak corrupt nahi banta jabtak ki use jindagi jine ke liye jaroori chije milta ho. Ek aam aadmi ki khwaise simit matra me hi hoti hai. wo bas itna chahta hai ki use itna mil jaye jisse ki wo khusi khushi jindagi ji sake na ki kaat sake. Jindagi jine se mera matlab ye hai ki use itna mile taki wo khud aur apne pariwar ko khush rakh sake. Kudka ghar ho, chhota hi sahi ek gadi ho, khane peene ki koi kumi na ho aur thoda bahot bank balance ho future ke liye. kum se kum itna kamaye jise ki saal me ek baar travel kar sake, mahine me ek ya do baar movie tickets kharid sake. Agar kabhi bimar huye to ilaz ke kharche ke liye karz na lena pade. Bas itni chhoti chhoti si khwaise hi to hoti hai ek aam aadmi ki.

Agar ye chije puri ho jaye to mai dawa ke saath keh sakta hu ki “Aam aadmi” kabhi bhi marji se bhrastachar nahi karna chahega. Yaha mera “Aam aadmi” se matlab un logo se hai jinme lalach to hoti hai lekin simit matra me. wo vyakti jo apni jaroorat ki souk pura karne ke liye corruption karta hai naki hawa mahal khada karne ke liye.

Agar hume wakai me bhrastachar khatam karni hai to hume iske jad ko khatam karna hoga. Hum insaan ke lalach ko to khatam nahi kar sakte lekin unki jaroorat ko pura karne ki jaroor koshish kar sakte hai taki unme lalach ki bhawna kum ho.

Sarkar chahe to system me sudhar lakar bahot kuch kar sakti hai. Agar ghus dekar naukriyan milna band ho jaye aur imandari ki padhai se talent ke aadar par naukri mile to log padai me jyada focus kar payenge. Aur is tarah se siksha vyastha me bhi dheere dheere sudhar aayega. Log padai pe jyada mehnat karenge kyuki use malum hoga ki ghus dekar naukri nahi mil sakti. Aur jab achhe pade likhe log naukri karenge to automatically har khetra me desh ki pragati hogi.

Agar sarkar har vyakti ko apna ek ghar dilade to kisi bhrashtachar ke raste jane ka mouka hi nahi milega. Har vyakti ka ek sapna hota hai ki kisi tarah se paise ikattha karke apna ghar liya jay. iske liye kai baar vyakti galat tarike se paisa kamana lagta hai. Kyuki imandari ki paise se to use ek scooty kharidne ke liye bhi sochna padta hai. Aur rehne ke liye ghar bhi jaroori hai. To aise me vyakti ke paas do hi option hai. ya to imandari se paise ikattha karne ke liye puri zindagi mehnat kar kar ke apna jindagi ka kawada bana dale ya fir corruption ka rasta chunkar jindagi ka sapna pura kare. Ab jaise ki insan ka fitrat hota hai ki wo humesha aasan taika dhunta hai to jahir hai ki jyadatar logo ke man me ye baat rehegi ki kisi na kisi tarah se paisa kamaya jay aur apna ghar ka sapna pura kiya jaye.

Aise me agar sarkar logo pe ek meharbani kar de to sara masla hi hal ho jaya. Chhota hi sahi har pariwar ko ek ghar dila de. Aur ek achhi naukri. Fir to logo ke pas faltu ki chije sochne ka time hi nahi rahega. Wo aaram se khushi khushi apni zindagi bitayenge apne ghar pariwar ke saath.

Aajkal har koi ek dusre ko lootne me laga pada hai. Corruption to har khetra me hai aur iske bahot se shrot hai jo hum sabko pata hai chahe wo ghus ho, chunaw me dhandhli ho, hafta wasuli ho, jabran chanda lena ho, thagi ho, tax chori ho, black mailing ho, jhootha mukadama ho ya pariksha me nakal ho aur bhi bahot se tarike hote hai lekin maksad bas yehi “swarth aur lalach” kisi tarah paisa kamana hai aur bada aadmi banna hai apne aapko dusro se upar rakhna hai. basically ye wo log hote hai jo khusi khushi zindagi jina chahte hai. Par mahoul aisa bana hua hai ki jitna jyada paisa kamaya jaye utna hi khush raha ja sakta hai. Par asal me aisa hota nahi hai. Khush rehne ke liye paise ki utna hi jaroorat hoti hai jitna ki zindagi jeene ke liye jaroori hota hai. Lekin afsosh is baat ka hai is baat ka pata vyakti ko tab tak nahi chalta jab tak ki wo khud noto ki gadde me so na le.

Chhote machliyo ka to vyawstha kiya ja sakta hai lekin jo badi machliyan ye 2G 3G wale unke liye to kanoon ko aur sakt hona hi padega aur wo bhi jald se jald bade faisle lene padenge. Nahi to desh ko dheere dheere ye kab nigal jayenge pata bhi nahi chalega. Sarkar ko chihiye ki chhote mote choro ko pakadne ke wajay bade pade choro pe sikanja kashe taki logo ka chusa hua khoon wapas se logo ko mil sake. Aam aadmi ko apna haq mil sake. Nahi to ek din amiri garibi ka ye balance aisa bigdega ki charo aur sirf note to honge lekin khane ke liye anaj nahi hoga.

Mera manna hai ki naitikta ki baaten aajkal kitabo tak hi simit reh gaya hai. Asal zingagi me iska patan ho chuka hai jisko nazar andaaz nahi kiya ja sakta hai. Naitikta ki baaten ab bas TV debet ke liye aur bayanbazi me hi bacha reh gaya hai. Isliye ab hum sirf ye kehkar baat ko taal nahi sakte ki logo me naitikta ka patan ho chuka hai. dherya ki kumi hai, samajik patan ho gaya hai bla bla bla….

Ab jo hai so hai mahoul badal chuka hai, logo ki khwaise bhi bad gayi hai aur itne fast life me logo me patient ki kumi bhi ho gayi hai. log jald se jald aage badna chahta hai kyuki use darr hota hai ki itni bheed bhari dunia me kahi wo dusro se peeche na rah jaye. Isliye kisi pe blame karne ki wajay jaroori ye hai ki samashyaon ko sahi tarike se suljhane ka prayatna kiya jay. 21 wi sadi ke logo me agar hum 15 wi sadi jaisa naitikta dhundne ka prayas karenge to ye vyarth ka prayas hi sabit hoga. Bachane ke bare me wo sochta hai jinko kamana nahi aata hai. Sarkar ko chahiye ki jyada se jyada rojgar ke auwsar paida kare sari samashyayen apne aap hi door ho jayegi aur logo ko bhi chahiye ki thoda sanyam rakhe. Itni tej raftar se family badayenge to sarkar kya bhagwan bhi itna rozgar paida nahi kar sakta. Bhagwan ne sakti diya hai to uska galat istmaal na kare sanyam se kaam le agar aapme jara sa bhi desh prem ki bhawna hai to. Hum ghar me rehte hai jangal me nahi.

Jai Hind