Swachh bharat abhiyan – स्वच्छ एवं स्वस्थ भारत अभियान


Bharat ke Pradhanmantri dwara uthaye gaye kadam “Swachha Bharat Abhiyaan” wakai me kabile tarif hai aur hum sabko is abhiyaan se judkar deshhit me apni bhagidaari deni chahiye. Pradhanmantri Modi dwara diya gaya bhshashan sunkar aisa lagta hai ki unme wakai me deshbhakti ka bhawna hai aur desh ke liye kuch karne ka junoon bhi. Lekin kya itna kafi hai. Kya pradhanmantri ki tarah anya mantri aur bade adhikari bhi jagrook hai. Aur sabse badi baat kya hum khud jagrook hai. Kya hum me desh prem ki bhawna hai. Hum kisi ke deshbhakti pe saq nahi kar rahe hai. Humare desh ke har vyakti me desh bhakti ki bhawna bhi hai aur desh ke liye kuch karne ka joonun bhi lekin ye bhi sach hai ki niji swarth aur lobh ka jaal ne aaj insaan ko aisa jakad liya hai ki ye unke deshprem par hawi ho gaya hai. Humare desh me deshbhakto ki kumi nahi hai lekin unke dil me is bhawna ko jagane ki bahot jaroorat hai, tabhi desh ke sabhi samashyaon ka hal nikal kar aayega. Agar har vyakti ke man me desh ke prati prem hoga aur unhe is baat ka aabhash hoga ki wo jo kuch bhi kar raha hai wo desh hit se juda hai ya nahi to wo kuch bhi galat karne se pehle hazar baar sochega. Chahe wo vyakti pradhanmanti ho ya desh ki aam janta.Aur ye kaam itna aashan bhi nahi hai. ye kaam sirf sakht kaanoon se bhi possible nahi hai. iske liye sarkar aur jagrook samajik sansthao ko milkar iska manovyagyanik hal nikalna padega.

Humare desh me jitne bhi chhoti ya badi samashyaye hai wo mukhyata teen baaton se judi hui hai 1. Samajik kupratha 2. Kamjor Kanoon vyawashtha 3. Sankirn mansikta

Chahe saaf safai ki baat ho ya dahej hatya ka, Gender Inequality ho ya chahe Cast discrimination. Agar gehrai se socha jaye to sare samasyayen inhi teen baato se judi hui hai. Agar in teen badi samashayaon ka hal nikal jaye to mai dawe ke saath keh sakta hu ki desh me koi bhi samashyayen nahi rahegi aur sabhi ko khushhaal zindagi jeene ka soubhagya milega.

Is karya ko karne ke liye sarkar aur desh hit me karya karne wale sansthaon dono ko milkar kanooni aur manoyagyanik tarike se kaam karna padega.

Pehle desh ke kanoon me bahot bada badlaw lana padega aur dusre desho ke kaanoon ki tarah aur majboot banana padega.udaharan ke liye aajadi ke itne saalo baad bhi humare desh ke sadak ka haal kharab hai. kyuki kaanoon vyawashtha sahi nahi hai. aaj sadak ko banane ke liye jo bhi thekedaar hote hai wo apni swarth aur lobh ki wajah se sadak ka kaam thik se nahi karate aur usme bhi bhrastachar karne lagte hai.Lekin China me aisa nahi hota. waha ke kanoon me iske liye bhi kadi saja ka pravdhaan hai aur is kaanoon ka sakt tarike se paalan bhi hota hai. waha pe sadak ke theke ke saath saath thekedaar se sadak ki guarentee card bhi liya jata hai. aur us time period ke douraan agar sadak toota aur jaach me pata chala ki ye thekedaar ki laparwahi se hui hai to iske liye China ka kaanoon unhe dandit bhi karta hai aur bhari jurmana bhi lagata hai. Lekin is tarah ka kaanoon humare desh me nahi hai. yaha thekedaro ke man me jarabhi kaanoon ka dar nahi hai aur na hi wo yaha pe apni desh bhakti dikhate hai.

Isi tarah dusra udaharan lete hai. desh me daamini kand ko lekar itna bada aandolan hone ke bawjood humara desh ka kaanoon abhi tak un apradhiyon ka faansi baar baar talta rehta hai. To aise me hum ye kaise ummid kar sakte hai ki dubara aisi ghatnaye na ho. is tarah ka ghatiya kaanoon se to apraadh karne waalo ko aur say milega.

Koi bhi apradh par hum do hi tarah se ankush laga sakte hai. ya to kaanoon ka dar se ya samaj me logo ke soch me badlaaw lakar.

Aaj humare samaj ke logo ko samajik kuriti, swarth, lobh, irshya me itni buri tarah se jakad rakha hai ki unhe inse bahar nikalna namimkin sa lag rah hai. Pradhanmantri ki soch aur koshish to achhi hai lekin mujhe lagta hai ki desh me sahi mayno me badlaw ke liye itna kafi nahi hai.

aisa lagta hai ki kisi ne humare samaj me irshya aur lobh ka jaharili gas chhor diya ho. jo dheere dheere desh ke kone kone me failta ja raha ho. Prem apni khushbu jaise in jahrili gas ki prabhaw se dheere dheere apna ashtitya hi khota ja raha ho. wo aadar aur samman ki bhawna jaise nashta hota ja raha hai. agar humne jald hi inhe nahi roka to bahot jaldi ye samaj aur desh ko nasht kar dega.

Swachh Bhatat Abhiyan ki suruat to ho gayi hai lekin iske dusre pehlu ko bhi dekhna bahot jaroori hai. Wo ye hai ki logo ko jaagruk karne se pehle sahi vyavastha ka hona bahot jaroori hai. Kyuki jabtak swachhata ke liye sahi vyavastha nahi hoga tabtak hum kisi ye saaf safaai ka ummid bhi nahi kar sakte khaskar aadat me jeene wale logon se.
Agar desh ki rajdhaani me hi abhi tak toilet ki vyastha nahi hai to har gaon me iska kalpana karna baimani hogi. Aaj agar desh ki rajdhaani Delhi me bhi aapko raste me toilet jane ki jaroorat padti hai to aapko dhundna padta hai pareshaan hona padta hai kyuki iski vyavastha jagah jagah nahi hai. Socho agar desh ki rajdhani me ye haal hai to pure hundustan ka kya hoga.

Mai samajhta hu ki agar sarkar wakai me swachhata ke liye itni gambhir hai to unko pehle logo ke liye vyapak suvidha pradan karna hoga. taki toilet ke liye ya kuda fekne ke liye idhar udhar bhatakna na pade. Mera sujhaw hai ki har bas stand ke paas toilet aur kudedaan ki vyawastha honi chahiye. Aur har muhalle me kum se kum do bada kudadaan ka vyastha honi chahiye. Tabhi is abhiyaan ko pura kiya ja sakta hai. Agar vyavastha hogi to logo ko bhi sudharne ka man karega. Aaj aap kai jagah dekhte honge ki sadak ke kinare bane log deewar ko hi toilet bana dete hai. Kyu ? kyuki waha aas paas koi toilet ki vyastha nahi hota. Aaj sadak pe chalte chalte kisi ko thuk aati hai to sadak par hi thuk dete hai kyu ? kyuki jagah jagah dustbin ki vyastha nahi hai. Halaki aapko kuch aise log bhi mil jayenge jo jaanbujhkar gand failate hai. Iske liye unhe dandit kiye jane ki vyastha bhi honi chahiye.

Practically sochiye ki hum mall me, parks me airport me aur bhi is tarah ki jagah me gandagi nahi failate hai. Kyu ? kyuki waha jagah hi itna clean hota hai ki gandagi failane ka man hi nahi karta hai aur har chij ke liye paryapt vyastha bhi hota hai aur dekhbhal ke liye security bhi. Tuti futi aur dhool bhari sadak par jhadu chalayenge to saaf nahi hoga balki aur dhool udega. Isiliye jaroori ye hai ki pehle sadak aur gali muhalle ko thik kare aur jagah jagah dustbin aur tolet ki paryapt vyavastha kare tabhi log sahi mayno me is abhiyaan me judne ke liye ruchi lega.

Ek aur pehlu pe bhi dhyan dena bahot jaroori hai. Gaon me maine dekha hai ki abhi bhi is tarah ke log aapko bahot mil jayenge jinke paas toilet ki vyastha hone ke baad bhi wo khule me souch jana pasand karte hai. Aisi sthiti isliye paida hua hai kyuki bachpan se khule me souch jate jate ye unka aadat ban chuka hai. Aur jab koi aadat bachpan se laga hota hai to aisi aadat ko chudana sarkar ya kisiki bas ki baat hota nahi hai. Mai aise logo se aagrah karta hu ki humarai sarkar aapke liye vyavastha to kar degi lekin aapko bhi apni aadaton ko badalne ki jaroorat hai.

Isiliye hum mananiya pradhanmantri aur desh premio se aagrah karte hai ki ab samay aa gaya hai ki aap desh sewa ke liye khulkar samne aaye aur desh ko nasht hone se bacha le. Aur rajnitik partiyon se bhi anurodh hai ki kripaya har baat pe apni raajniti na kare. kum se kum achhe kaamo ko to aap saath milkar desh sewa ki bhawna se kar hi sakte hai. hume ummid hai ki achhe kaamo ke liye agar sabhi rajnitik partiyan aur janta ek saath milkar kaam karenge to humara Hundushtaan jaroor badlega.

Jai Hind